NU Diploma vs Coursera vs ITI

في أسئلة كتير عن مقارنة التراكين بتوع ال ITI و دبلومة جامعة النيل و كورسات كورسيرا او الكورسات الأونلاين عموما…
فأنا حابب أقول رأيي و أرجو من الزملاء هنا يقولوا رأيهم كمان عشان الناس اللي بتسأل تعرف توصل لرأي مجمع من الكل في مكان واحد…
مبدئيا أنا حاليا فاضل لي أسلم مشروع التخرج بتاع جامعة النيل إن شاء الله (دعواتكم) و انا كنت في اول دفعة للدبلوما… 
ثانيا أنا مدخلتش ال ITI قبل كدة و كل اللي حقوله من اللي عرفته من الطلبة اللي درسوا هناك أو من المشرفين على الدبلوما
و بالنسبة للكورسات أونلاين أنا ذاكرت كذا حاجة بس ده كان من فترة و مكانش لسة ظهرت حكاية ال specializations وقتها…

بالنسبة لجامعة النيل… الدبلوما اسمها Big Data and Data Science Diploma … مكونة من ترمين… في كل ترم مادتين… الترم الأول 
Big Data 1 and Machine Learning
مادة البيج داتا سواء في الترم الأول أو التاني تحفة… أكتر من رائعة… الدكتور سامح الأنصاري معلم بمعنى الكلمة… متفوتوهوش… و بمنتهى الأمانة لو مش هو اللي حيدرس المادة متدخلوش الدبلوما أحسن… و استنوا الدفعة اللي هو بيدرس فيها… المنهج عنيف بصراحة بس مفيد جدا… و كافي جدا كبداية تعرفك حتذاكر ازاي بعد كدة و تكمل كمحترف في المجال…
المادة التانية في الترمين Machine Learning and Data Mining
الترم الأول دكتور سيف الدولتلي و ده في الماشين ليرننج زي عمر خيرت في الموسيقى كدة… حاجة مزاج مش مجرد تعليم… و معاه في الترم الأول برضه دكتور أحمد فهمي احصا و احتمالات… أنا شخصيا كنت باخرج من المحاضرة عامل دماغ فعليا… استمتعت جدا و استفدت جدا من الكورس…
الترم التاني عندك اختيارين… كل اختيار بيدرسه استاذ مختلف… اللي بيدرسوا الترمين أساتذتي و على راسي من فوق… بس ما اقدرش اقول اكتر من كدة… انا ممكن ما اكونش استفدت بنفس الدرجة بصراحة و ممكن تاخدوا اراء الناس التانية… اعتقد ممكن الترم التاني داتا مايننج يكون أحسن من كدة بكتير…
الخلاصة عندك اربع مواد تلاتة منهم تحفة و الرابع ممكن يبقى أحسن من كدة بكتير…

بالنسبة لل ITI معنديش معلومات كتير لكن من اللي اطلعت عليه في وصف التراكين واضح ان واحد منهم مركز على البيج داتا أكتر… Systems and Development و ده غالبا حيكون موجه للي عايز يشتغل Big Data Developer 
و التاني Data Science اكتر للي حابب يشتغل Data Scientist
بس نصيحة مني للناس اللي بتختار… بلاش كلنا نهجم على الداتا ساينس… انا عارف كويس انه الداتا ساينس احلى و اجمد… و على فكرة مطلوب في سوق العمل بمميزات اعلى… بس فرصة ان حد يشتغل داتا ساينتست و هو لسة خريج بتبقى ضعيفة عشان فعلا المجال صعب… و فرصة ان واحد متخصص بيج داتا يتعلم و ينقل و يشتغل داتا ساينتست أعلى… يعني انا لو متقدملي اتنين واحد فيهم مجرد دارس كورسات داتا ساينس و التاني عنده خبرة عملية في مجال البيج داتا و عنده نفس المعرفة اللي عند الأولاني حاخد التاني بالتأكيد… ده غير ان فرص البيج داتا في السوق أكتر من حيث العدد و الأماكن… و أحسن لك ١٠٠ مرة تشتغل بيج داتا و تذاكر داتا ساينس بحيث تنقل قدام من انك تتخرج داتا ساينتست و متلاقيش شغل و تقعد تذاكر برضه… بفكركم برضه: ده رأيي الشخصي و خبرتي اللي شفتها في السنين اللي فاتت…

بالنسبة للكورسات أونلاين… كورسات كورسيرا بالذات… تحفة يا جماعة… انت بتتعلم من الأساتذة اللي في المجال سواء كأساتذة أو كشركات بت sponsor … متستقلوش خالص بكورسيرا و شهاداتها بس اللي يدخل كورس ياخده بجد و يحل ال assignments and project و يلتزم كإنه في جامعة بالظبط… بلاش حركات المصريين (و أنا أولهم و سيد مين يعمل الحركة الناقصة دي ربنا يهديني) بتاع اول محاضرتين في الكورس و اول صفحتين في الكتاب… لو انت من النوع الصايع ده يبقى تروح بأدبك تقدم في جامعة النيل عشان تلاقي دكتور يجري وراك بالخرزانة و يخليك تذاكر و خصوصا لما كل شهر تدفع فلوس الجامعة من لحمك الحي و تروح المحاضرات في عز تعبك ففي الآخر تستخسر كل ده يروح هدر فتضطر تذاكر زي العيل المشاغب…

يا ريت كل اللي عنده رأي أو معلومة يقولها هنا عشان الكل يستفيد… و بالتوفيق إن شاء الله…

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s